თუ მასპინძელი თანხის Airbnb‑ს გვერდის ავლით გადახდას გთხოვთ…

Airbnb კრეფს ჯავშნის სრულ ღირებულებას, თუმცა ამ კუთხით არსებობს რამდენიმე გამონაკლისი.

ზოგიერთ მასპინძელს უფლება აქვს, Airbnb‑ს პლატფორმის გვერდის ავლით მიიღოს გარკვეული დამატებითი თანხა, თუმცა ყველა სავალდებულო გადასახადი მითითებული უნდა იყოს ფასის დეტალიზაციაში, ჯავშნის გაფორმების მომენტში.

თანხები, რომელთა მიღებაც მასპინძელს უშუალოდ სტუმრებისგან შეუძლია

არსებობს შემთხვევები, როცა მასპინძელს გარკვეული გადასახადებისა და მოსაკრებლების აკრეფა სჭირდება უშუალოდ სტუმრებისგან, Airbnb‑ს პლატფორმის გვერდის ავლით. აღნიშნულის უფლება მხოლოდ კონკრეტულ მასპინძლებს ეძლევათ. მსგავს შემთხვევებში თანხის გადახდა, როგორც წესი, საჭიროა სტუმრობამდე, მისი დაწყებისას ან დასრულების შემდეგ 48 საათის განმავლობაში.

ადგილობრივი გადასახადების ადგილზე აკრეფას ზოგან მასპინძლებს კანონი ავალდებულებს. ისინი დეტალურად უნდა იყოს განმარტებული განცხადების „აღწერილობის“ სექციაში ან სახლის წესებში, თუ შესაბამისი თანხები არ აისახება ფასის დეტალიზაციაში, ჯავშნის გაფორმების მომენტში. შეიტყვეთ ვრცლად იმის შესახებ, თუ რა ტიპის ოფიციალური მოსაკრებლების გადახდა ეკისრებათ სტუმრებს.

ამას გარდა, ზოგიერთი მასპინძელი სტუმრებს მეტი კომფორტისთვის სთავაზობს დამატებით საყოფაცხოვრებო პირობებსა თუ ნივთებს, რომლებიც მათ, სურვილისამებრ, შეუძლიათ მოითხოვონ. აღნიშნულისთვის თანხის გადახდა გათვალისწინებულია Airbnb‑ზე, საკითხების გადაწყვეტის ცენტრის მეშვეობით.

შეიტყვეთ ვრცლად იმის შესახებ, თუ რა ტიპის თანხების მიღება შეუძლიათ მასპინძლებს Airbnb‑ს გვერდის ავლით.

სამოქმედო რჩევები მასპინძლის მიერ თანხის Airbnb‑ს გვერდის ავლით გადახდის თხოვნის შემთხვევაში

მასპინძელს უფლება აქვს, გთხოვოთ, Airbnb‑ს პლატფორმის გვერდის ავლით დაფაროთ გადასახადი, რომელიც მითითებული იყო ანგარიშსწორებისას, ჯავშნის ღირებულების დეტალიზაციაში, ან ოფიციალური მოსაკრებელი, რომლის აკრეფაც დაშვებულია Airbnb‑ს გვერდის ავლით და რომელიც აღნიშნული იყო განცხადების „აღწერილობის“ სექციაში (ან სახლის წესებში). აღნიშნულ შემთხვევებში თანხის გადახდა შესაძლებელია როგორც პირადად მასპინძლისთვის, ისე საგადახდო აპის ან საკითხების გადაწყვეტის ცენტრის მეშვეობით.

სასტუმროებისთვისაც ნებადართულია ნებაყოფლობითი მომსახურებებისთვის (მაგალითად, პარკინგისთვის) თანხის მიღება Airbnb‑ს პლატფორმის გვერდის ავლით, თუ აღნიშნული მისი სტანდარტული პროცედურის ნაწილია.

დანარჩენ შემთხვევებში მასპინძლებმა ნებაყოფლობითი მომსახურებებისთვის თანხა უნდა მიიღონ საკითხების გადაწყვეტის ცენტრის მეშვეობით.

ნებაყოფლობითი მომსახურებებისთვის (მაგალითად, პარკინგისთვის, გაუმჯობესებული საყოფაცხოვრებო პირობებისთვის და ა.შ.) გადასახდელი თანხის მისაღებად უნდა გამოიყენებოდეს ჩვენი პლატფორმა, კერძოდ, საკითხების გადაწყვეტის ცენტრი.

თანხის გადახდის საეჭვო თხოვნების შეტყობინება Airbnb‑სთვის

თუ ვინმე თანხის Airbnb‑ს გვერდის ავლით გადახდას წინასწარი გაფრთხილების გარეშე გთხოვთ (მაგალითად, პირდაპირ Airbnb‑ს, ელფოსტის ან კომუნიკაციის სხვა მეთოდის საშუალებით), შესაძლოა, საქმე თაღლითობასთან გქონდეთ. გთხოვთ, დაუყოვნებლივ შეგვატყობინოთ, თუ:

• ეჭვი გაქვთ თაღლითობაზე;
• სრულიად მოულოდნელად მიიღეთ თანხის Airbnb‑ს გვერდის ავლით გადახდის თხოვნა;
• გსურთ, გაასაჩივროთ მასპინძლის მოთხოვნა თანხის გადახდასთან დაკავშირებით;
• მიიღეთ ელწერილი პლატფორმის მიღმა არასანქცირებული საგადახდო ოპერაციის შესრულების თაობაზე (აღნიშნული მოიცავს თანხის გადახდის თხოვნებს პირებისგან, რომლებიც თავს Airbnb‑ს წარმომადგენლებად ასაღებენ);
• თვლით, რომ მასპინძელი ცდილობს, გადაგახდევინოთ სავალდებულო თანხა, რომელიც არ იყო მითითებული ფასის დეტალიზაციაში ჯავშნის გაფორმებისას (მაგალითად, შინაური ცხოველის გადასახადი, კომუნალური გადასახადი, გირაო საკუთრების დაცულობისთვის და ა.შ.), ან ფიქრობთ, რომ მასპინძელი საერთოდ არ უნდა ცდილობდეს თანხის მიღებას Airbnb‑ს გვერდის ავლით.

ყურადღება მიაქციეთ თაღლითობის ნიშნებს: ფულად ან საბანკო გადარიცხვებთან დაკავშირებულ თხოვნებს, საბანკო ჩეკებს, საფოსტო ფულად გზავნილებს, ინვოისების PDF‑ ან მატერიალურ ვერსიებს და ა.შ.

საეჭვო მონაწერის შესახებ შეტყობინება